Ондар Дукурович Охемчик Тыва АССР-ниӊ культуразыныӊ алдарлыг ажылдакчызы, Күш-ажылдыӊ хоочуну, ТР-ниӊ «Шылгараӊгай күш-ажыл дээш» медальдарныӊ эдилекчизи, Россияныӊ Журналистер эвилелиниӊ, ТР-ниӊ Чогаалчылар Эвилелиниӊ кежигүнү чораан. О. Д. Охемчик 1937 чылдыӊ август 10-да Чөөн-Хемчик кожууннуӊ Сүт-Хөл сумузунуӊ Чечектигге төрүттүнген. Манчүректиӊ эге чада школазындан эгелээш, Бора-Тайга чеди чыл школазын, Кызылдыӊ башкы училищезин дооскан. Москвада партияныӊ Дээди школазыныӊ журналистика факультединге өөренген. Ак-Даш школазынга башкылап эгелээш, Сүт-Хөлдүӊ комсомол райкомунуӊ иструкторунга, оон бирги секретарынга, кадыкшылга школазыныӊ өөредилге эргелекчизинге, директорунга, социал — хандырылга аяамызыныӊ улуг инспекторунга, «Сукпак» совхозтуӊ ажылчын комитединиӊ даргазынга ажылдап чораан. Парлалгаже шилчээш, «Тываныӊ аныяктарыныӊ» килдис эргелекчизинге, 1996 чылдан 1999 чылга чедир «Шын» солунга үлетпүр килдизинге фотокорреспондентилеп ажылдап чораан. Сөөлгү чылдарда «Мемориал» музейниӊ директорунга ажылдап турган. Ажылдап чораан үелеринде ооӊ ажылынга онзагай хамаарылгалыын, кижилер-биле бир тускай чугаалажырын билген мен. Ондар Дукурович аныяктар-биле кончуг чоок сырый ажылдаар кижи. Ол чылдарда Ондар Дукурович «Тываныӊ аныяктары» солуннуӊ чанында тургустунган «Дамырак» чечен чогаал каттыжыышкынга чогаал ажылынга сонуургалдыг аныяктарны чыып, эвилелдеп турган. Оларныӊ эӊ-не эки деп үнелел берген чогаалдарын ол бөлүктээш, тускай арыннарга үндүрүп турду. О. Д. Охемчикти Тываныӊ кандыг-даа булуӊнарынга чедип каапкан, оон янзы-бүрү темаларлыг фото-чуруктарны кылган мергежилдиг журналист дизе черле частырыг болбас боор. Чогаал ажылын 1958 чылда эгелээн, шүлүктерин республика солуннарынга, «Улуг-Хем» сеткүүлге доктаамал парладып чораан. «Ажылчынныӊ ынакшылы» деп баштайгы ному 1974 чылда чырыкче, ийиги ному «Чалыы назын хоорайы» деп ат-биле 1982 чылда парлаттынган. Ооӊ шүлүктери орус, хакас, якут, кыргыс дылдарда очулдурттунгулаан. О. Д. Охемчик республика чергелиг янзы-бүрү хөй-ниити хемчеглериниӊ идепкейлиг киржикчизи, фотоделгеглгелерге чаӊгыс эвес удаа лауреат бооп чораан.
«Күш-ажыл кижини каастаар» дээр. Шынап-ла, бодунуӊ кызымаккай, чүткүлдүг тура-соруу-биле чонунга бараан болуп ажылдап чорааш, ол шак мындыг алдар-аттарга, шаӊнал-макталдарга четкен.
Ондар Охемчик Дукурович: ооӊ дугайында // Улуг-Хем. – 2004. – № 3. – А. 195. – Сөзүглел: дорт.
Шоюн, А. Амыдыралы парлалга ажылы-биле тудуш: О. Д. Охемчик дугайында / Шоюн А. – Сөзүглел: дорт // Сылдысчыгаш. – 2002. – Август 6. – Ар. 3.
Информацияны белеткээни
Чавынчак Д. А.
