Чигжит Салчак Авыр-оолович – башкы, прозачы, журналист.
Ол 1922 чылдың декабрь 5-те Тыва Арат Республиканың Бай-Тайга кожууннуң Хѳл сумузунга тѳрүттүнген. Салчак 1947 чылда эге школаны дооскаш, ол-ла чылын Кызылдың каттышкан школазының база бир салбыры башкы техникумунга кирип алган. 1951 чылда, күзүн, кѳдээже чорупкан.
Ооң ажылчы базымнары Сүт-Хѳл кожуунга эгелээн. Сүт-Хѳлге эге школа тудуунга дыка улуг үлүг-хуузун киирген. Салчак Авыр-оолович ол школага эң баштайгы башкы болуп ажылдап чораан. Үре-түңнелдиг, чедиишкинниг ажылы дээш, директорлап база турган. Суг-Аксы, Хѳнделең, Самагалтай суурларга башкылап, кожууннуң ѳѳредилге килдизин эргелекчилеп чораан. 1949-1950 чылдарда Самагалтай школазынга директорлап, ажыл-ишчизин чонга бадыткаан. 1952-1954 чылдарда Областың совет партия школазынга ѳѳренгеш, ооң соонда партия шугумунга ажылдап келген.
1960 чылдардан эгелеп, Салчак Авыр-оолович «Шын» солунга база телевидение болгаш радио комитединге 25 чыл дургузунда ажылдаан.
Чогаадыкчы ажылы
Салчак Авыр-ооловичиниң чогаалга сундулуу Кызылдың каттышкан школазынга ѳѳренип турган чылдарында эгелээн. Сергей Пүрбүнүң удуртуп турганы чечен чогаал бѳлгүмүнге илереп келген. Ооң шүлүктери ук ѳѳредилге чериниң «Каадыр» деп хана солунунга парлаттынып турган. «Улуг-Хем» альманахка, солуннарга шүлүктери, тоолдары, чечен чугаалары чырыттынып турган.
Ол «Мешкен хѳл», «Аза кымыл?», «Артык сеткил ара дүшкен», «Доңгак оглу», «Чалгаапай», «Эжеш истер», «Далбый», «Сеткиливис ханар», «Найырал» деп чечен чугааларның база «Ѳргүн чонну эргип чорааш» деп очерктиң автору.
Ооң «Артык сеткил ара дүшкен», «Мешкен хѳл» деп чечен чугааларын А.К. Ойдан-оол, С.К. Тадар-оолдуң 5-9 класстарның «Эдертиглер чыындызында» киирген.
Тываның комсомол шаңналының лауреады, салым-чаяанныг шүлүкчү Антон Үержаа 1991 чылда аъдының бажы хоя берген чогаалчыларның: Алексей Белек-Байыр, Танов Тоюндуп, Хирлиг-оол Ооржак, Куулар Сүттүг-оол база Салчак Чигжиттиң чогаалдарын, солун-сеткүүлдерин, чогаалчыларның ѳг-бүле архивтеринден чыып, «Чүректерниң тураскаалы» деп чыындыны чырыкче үндүрген.
Ол чыындыда Салчак Авыр-ооловичиниң дугайында чогаалчы Салим Сүрүң-оол чылыг сактыышкынны бижээн. База ында авторнуң дыка хѳй чечен чугаалары парлаттынган.
Салчак Авыр-оолович 1985 чылда мѳчээн-даа бол, ооң бижээни чечен чугаалары чырыттынып, тыва литератураны байлакшыдып чорууру ѳѳрүнчүг.
Материалды А.С. Пушкин аттыг
Национал ном саңының редактору
Момбулай Оралмаа Меңги Ооржактың
«Бай-Тайга – уран чүүлдүң кавайы»
деп номундан белеткеп, бижээн.
Чуруктарны ажыглаан литературадан алган.
