Бир өг эрте чазын хойтпактай берген дижик. База бир өгнүң инектери бызааларын соңгудактап төрээн, ооң соонда сүт-сааны элбээн дижик. Ам хойтпактаар өй келген. Ол өгнүң кадай ээзи эртенги саалданы дооскаш, бир хууң сүттү тудуп алгаш, хойтпактаан өгже хөреңгилеп чоруптар. Ол баарда, бичии кызын, бир болза бичии оглун эдертип аар чаңчыл турган.
Хойтпактыг өгнүң кадай ээзи хөреңгилеп келген эжиниң хууңда сүдүн доскаардыва кудупкаш, былгааш-биле былгап-былгап, ол-ла хууңну долдур хойтпакты кудуп бээр.
Хөреңгилээн кадай аалынга чанып келгеш, куруг доскаардыва саваларда сүдүн куткаш, бир хууң хөреңгизин ынаар немээш, бышкы-биле шииледир быжар. Бир хонганда, хойтпак ажый бээр.
Алган дөзү:
Кенин-Лопсан М.Б. Тыва чаңчыл – Кызыл – 2017. А. 226
