Ыры — сагыш-сеткилдиң илередикчизи, каастакчызы, эртинези. Шак ындыг кайгамчыктыг эртине-байлакты чонга сөңнеп, кижилерниң сеткил-хөөннерин өөртүп, байыдып чоруур композиторларывыс кайы хей. Оларның бирээзинге тыва чоннуң база бир ат-алдарлыг оглу, композитор, хөгжүмчү, уян, чараш аялгаларның автору, бойдустан салым-чаяанныг Базыр Григорий Яковлевич хамааржыр.
Григорий Базыр катаптаттынмас уран талантылыг композитор. Ооң бижээн ырлары тыва уран чүүлдуң база бир чедиишкини, чоргааралы. Композиторнуң кайгамчык чаагай мөзу-шынары, ак сеткилдии, кижилерни чайгаар хей-аът киириптери — бо бүгү талалары ооң ырларында сиңниккен.
Базыр Григорий Яковлевич 1950 чылдың июнь 20-де Бай-Тайга кожууннуң Көп-Сөөкке төрүттүнген. Тээли ортумак школазын дооскаш, бичиизинден тура хөгжум-аялгага сундулуун бадыткап, Кызылдың уран чүүл училищезиниң национал хөгжүм херекселдериниң салбырын чедиишкинниг дооскан.
Каа-Хем кожуунга Көк-Хаакка, Бии-Хемниң Туран хоорайның «Колос» аттыг культура бажыңынга методистеп, башкылап, Суш, Шивилиг суурларының культура бажыңнарынга директорлап ажылдап чораан. Хей чылдарда үре-туңнелдиг ажылы дээш, Григорий Базырга «Тыва АССР-ниң культуразының алдарлыг ажылдакчызы» деп хүндүлүг атты тывыскан.
Бии-Хем кожууннуң Шивилиг арбанының Культура бажыңы Григорий Яковлевич Базырның адын эдилеп турар, 2019 чылда Тыва Чазактың төлевилели болур «Урянхай-Тыва дептерже» ады кирген.
Хүндүлүг номчукчу, хөгжүмчү Григорий Базырның чырыткылыг овур-хевирин мөңгежидип, база ол ышкаш композиторнуң 70 харлаан юбилейлиг байырлалы таварыштыр бо номну ундуруп, ырларның баянга үделгезин сеткилимниң ханызындан кылдым.

Тыва Республиканың Композиторларының Чогаадыкчы Эвилелиниң оралакчы даргазы Томас Конзай-оолович Монгуш